Descrizione
Sa presentada si fait martis 23 de Abrili 2024, in sa Biblioteca Comunali, in su Parcu s’Arei, a is oras 17:00, e est a indonu poita fait parti de is atividadis culturalis in lìngua sarda promòvias de sa Provìncia de su Sud Sardigna e finantziadas de sa Regioni Sardigna cunformas a sa L. 482/99 e a sa L.R. 22/2018. Su cumbidu est po totus, mannus e piticus, mammas, babbus e ajajus.
A sa presentada nci est s’autori Luigi Tatti chi ndi arrexonat cun sa dotora Giorgia Serpi.
S’urtima opera cosa sua est “Favola…re”. Giai su tìtulu si scoviat de ita fueddat su libbru. Funt contus po is pipius, is piciocus ma po is mannus puru poita is istòrias bolint imparai a totus una morali. Funt contixeddus crutzus chi pigant fueddu de sa vida de ònnia dì, innui pipius e animalis arrexonant a pari e intra de issus nàscit arrespetu. Cumenti is favolas chi giai connosceus su proponimentu est cussu de fai atinai is chi ligint. Is personàgius arregodant meda su caràtiri de s’autori poita po issu s’ ecologia e is traditzionis sardas funt duus aexus de importu po is pipius e is piciocus de oi.
In su libbru agataus rimas e puru cincu testus teatralis chi si podint potai in iscena.
Luigi Tatti est nàsciu in Arbus in su mesi de Abrili de su 1950. Ammantiosu de sa poesia in lìngua sarda, fueddat e iscriri in sardu. At iscritu meda cummedias e libbrus chi dd’ant fatu binci puru prèmius literàrius. At fundau sa cumpangia teatrali “Su Fazzoni” e impari a issa at girau sa Sardigna po ponniri in iscena is commèdias cosa sua. Su iscriri po is giòvunus dd’at fatu cumprendi cantu po issu est de importu imperai sa lìngua sarda a iscola e a foras.